Denmark 1. Tag

Vom Fritig bis am Mentig sind mer (John und sini Schwöster d'Suz, Clare, Lucas und i) in Süde uf Denmark abe gange. D'Fahrt isch normalerwiis ca. 4 .5 bis 5 Stund aber, will mer halt de Lucas debi gha hend, ischs chli länger gange. Es isch genial gsi...mit Usnahme vom Wetter. Het nämli so zimli di ganze vier Täg grägnet.

Am Samstig Morge hend mer en chline Spaziergang um üses Hüttli gmacht. In Denmark hets viel Wald und üsi Unterkunft isch devo umringt gsi :-)


Churz druf sind mer de Ocean Beach go aluege gange. Wunderschön...aber ebä...s'Wetter. Sie hend gseit im Summer segs en Traum. Muess also wohl oder übel wieder mol zrugg cho ;-)


Aschlüssend hend mer de Lights Beach bewunderet. Isch eifach en Traum gsi. I wär gad go bade, wenns ned so mega chalt gsi wär. 20 Grad hend mer also nie gha da Wuchenend! S'Thermometer het immer so zwüsched 10 und 15 Grad gschwankt.




Noch denä zwei wunderschöne Stränd, sind mer ine Imkerei gange. Die hend huuseiges Glacé gha. I ha Yoghurt-Honig probiert. Mmmmhhhh...super lecker gsi!


Noch de Imkerei ischs denn wiiter gange zum John sinerä zweitä Schwöster, de Jane, is Studio. Sie wohnt scho sit längerem in Denmark und somit hend mer üsän Usflug gad mitemenä Bsuech i ihrem Molatelier chönne verbinde.