Cape Tribulation, Great Barrier Reef, Cairns & Ayers Rock

Noch Sydney isch es denn wiiter uf Cairns gange. Det han i nur ei Nacht verbrocht und am nögschte Morge isch es denn noch Cape Tribulation gange. De Ort, a dem i ha wölle Sunne tanke und fuul am Strand ligge. Jo us dem isch denn leider nix worde. Es het di meischt Ziit grägnet. Glücklicherwiis ischs am erstä Tag no schö worde geg de Obig...so han i glich no es paar gueti Fotenä chönne mache.


Vom Great Barrier Reef han i leider praktisch kei Föteli. Es isch en nasse, regnerische Tag gsi und i ha mini Kamera ned allzu oft dem Salzwasser wölle ussetzä.Eifach es paar Föteli, dass er öppe chli en Idruck hend. Uf de eintä Föteli gseht me unter anderem s'schlechti Wetter ;-) und de Katamaran, wo üs use gfahre het. Wiederum gseht me, dass trotz de Wolke und em Regä s'Wasser immerno türkisblau gsi isch. Det go schnorchle isch eifach en Traum! Müend nur mol Bilder mit Great Barrier Reef google. Genau so hets nämli usgseh :-)

De letscht Nomi vo mim Trip han i denn nomel in Cairns verbrocht, wo i chli d'Stadt besichtiget ha und ad "Lagoon"gange bin. Da isch wie e Badi direkt am Meer, muesch aber kei Itriit zahle oder so und es het überall Grill umenand zum Barbecue mache :-)


Uf em Heiflug han i en vier stündige Stopp in Ayers Rock gha. Jo leider het mer de Uluru oder susch irgendwas ned vom Flughafe usgseh und zum det ane fahre, het me ca. füf Stund gha. So bin i halt chli um de Flughafe gloffe und ha Föteli vo dem schöne rote Sand/Stei gmacht! :-)

Sydney

Nochher isch es denn wiiter noch Sydney gange. De Harbour mit Harbour Bridge und Opera House het mer mega guet gfalle!


A eim Tag han i en Usflug mit de Fähre ad Watsons Bay gmacht. Det bin i denn zu de Küste (The Gap) spaziert. Leider chömmed det viel Suizidfäll vor (ca. 50 jörlich!).


Natürli han i au am weltberüehmte Bondi Beach en Bsuech abgstattet :-)

Melbourne

Lang her, siit i s'letscht Mol en Post erstellt ha :-) I de letschtä zwei Wuche bin i a de Ostküste Australiens gsi. Mini erstä 5 Täg han i in Melbourne verbrocht. Es isch recht chalt gsi aber glücklicherwiis hets sehr seltä grägnet! Es het mir sehr guet gfalle, vor allem de Yarra River und d'Victoria Markets :-) Aber i chönnt ned det wohne, isch mer eifach z'gross :-)


A mim letschtä Tag in Melbourne han i en Trip zu de Great Ocean Road gmacht. Da isch mega genial gsi. Mer sind e chlises Trüppli gsi mit de verschiedenste Nationalitäte (Frankreich, Irland, Deutschland, Italien, Korea und natürli d Schwiiz ;-) ) und hends u glatte mitenand gha :-)

Pinnacles

Über s'Wuchenend sind mer in Norde uegfahre zum d'Pinnacles z'bestune. D'Iris und de Graeme (Kollege vo Clare und John) sind mit ihrer 2-jöhrige Tochter de Eva mitcho. S'Wetter isch wunderbar gsi und die Steinformatione hend bi Sunneuntergang eifach wunderschön usgseh.





Am nögschte Morge sind mer vor de Heifahrt denn no an Strand gange.

Rottnest Island

Hüt bin i mit de Suz, em John sinerä Schwöster, uf Rottnest Island gange. Am halb sechsi isch Tagwach gsi. Halb verschlofe hend mer üs mit üsnä Velos uf de Weg noch Fremantle gmacht. Mit em Eagle Express (rots Boot) sind mer denn uf Rottnest beförderet worde...isch e rasanti Fahrt gsi, obwohl de Seegang hüt sehr ruhig gsi isch :-)


De erst Mensch, wo uf Rottnest Island cho isch, übrigens en Holländer, het die herzige Tierli gseh, wo uf derä Inslä lebed und het glaubt, es segäd Ratte...und wills vo denä süessä Tierli so viel gha het, het er die Inslä Ratsnest tauft, was denn schlussendlich zu Rottnest gführt het :-) Glücklicherwiis sind die nidlichä Inselbewohner Quokkas gsi :-)



D'Velos sind eifach perfekt gsi zum d'Inslä z'erkundige. Z'erst hend mer s'Bathurst Lighthouse besichtiget, sind denn wiiter zum Pinky Beach, The Basin, Longreach Beach und Geordie Bay, wo mer denn glichziitig üsän z'Morge gessä hend. Unterwegs hend mer die schöne Salzsee chönne betrachte.


Noch derä Pause sind mer denn weg vo de Küste und is Inselinnerä gfahre, verbi a de Salzsee zum Wadjernup Lighthouse. Vo dem Lüüchtturm us het mo en Blickwinkel vo 360°. S'Bathurst Lighthouse het nur gad en Blickwinkel vo 180°, was vor vielnä Johr zumne schreckliche Unfall gführt het. Es Schiff het uf de anderä Siitä vo de Inslä es Schiffsunglück gha und will mes ned gseh het, sind zig Menschä ums Läbe cho. Da isch denn schlussendlich de Hauptgrund gsi, zum en neue Lüüchtturm baue.
Aschlüssend sind mer zum West End vo de Inslä gradlet. Isch no wiit gsi aber mer sind belohnt worde mit wunderschöne Stränd, glasklarem Wasser und zwei Delphinschwärm :-)


Nochdem sind mer wieder retour gfahre und hend richtig Süde gehebet, wo mer am Salmon Bay verbi sind und üsän z'Mittag an Little Salmon Bay gnosse hend :-) Uf em Retourweg sind mer denn no bi de Henrietta Rocks verbi cho.


De wunderschön Sunneuntergang het de glunge Tag perfekt abgschlosse!

Spaziergang am Cottesloe Beach

Gescht Morge isch es wieder emol traumhaft schö gsi am Cottesloe Beach :-)

Caversham Wildlife Park

Geschter sind d'Britt und i in Caversham Wildlife Park gange, um all die iheimische Tierli z'betrachte :-) S'Wetter isch eifach perfekt gsi...mer hend sogar im Libli chönne umelaufe, wa do momentan es chlises Wunder isch. Vom Känguruh, über Koala, Emu bis hin zum Tasmanische Tüüfel han i alles gseh :-)




D'Känguruhs sind erstunlicherwiis die meist Ziit nur fuul umeglegä und wos denn eimol aktiv gsi sind, isch das so überraschend cho, dass mer gar ned druf vorbereitet gsi sind. Hend denn aber glich no es paar "gumpendi" Känguruhs verwütscht ;-)